( Винарница Тиквеш , Кавадарци. Chardonnay, special selection, oak edtion, 13% алкохолност, берба 2015, цена 400 денари)
Според сите гастрономски правила ракија и жестоки алкохоли не се консумираат пред јадење, особено не ако со јадењето имате намера да пиете вино. Од едноставна причина што непцата ќе во отапат и нема да може да уживате во прекрасните вкусови на виното. Всушност, во жешки денови жестокиот алкохол ионака не оди. Овој обичај, вино како аперитив, веќе одамна е усвоен во земји со богата гастрономска култура. Затоа би ви сугерирале како аперитив да се напиете од прекрасното шардоне на ТИКВЕШ special selection, oak edtion, исклучително вино со исклучителни ароми и вкусови. Ова вино сосема го заслужува зреењето во нови дабови буриња, зашто не секое вино се става во дабови буриња. Тоа е привилегија на исклучителните.
Сортата шардоне важи за кралица не белите вина. Од неа се прават фантастични вина и затоа е една од најраспространетите во светот. Прославените бургундски бели вина се добиваат главно од шардоне. Шампањските вина се исто така од шардоне. Во разни региони на светот шардонето дава специфични резултати. Кај нас исто така. Затоа во македонското шардоне се добиват многу интересни густативни и ароматски доживувања.
Што ќе можете да почувствувате? Би рекле, сешто. Од вкусови и мириси на диња, манго, ванила , кокос, бадем, до ароми на кафе и марципан. Ако имате фантазија за вино ќе почувствувате и многу повеќе. Фантазијата е дел од винското доживување. Ова вино има средно долг финиш, ќе го запаметите и распознаете. Лесно е така и вие ќе се почувствувате.
Аперитивот е почетокот. Со него можете да мезите разни грцки, лесни канапеа, но не многу солено. Ако имате соодветна храна можете и да продолжите со ова шардоне. Риби како туна и салмон, одлично одговараат, а и пастрмката на охридски начин одлично ќе легне. Добра летна тава е добро решение. Оди и со печурки.
Разладете го на температура од 12 -14 степени. Но на овие горештини можете да го разладите и повеќе.